Létt gönguleið. Gengið eftir greiðfærri jeppaslóð. Leiðin liggur upp sunnan Svartfells, eftir Þrándarhrygg, Gagnheiði, niður Hesta og sem leið liggur niður að skýli og skála sem standa þar sem Litlaá og Stóraá mætast.

Skemmtilegur útúrdúr eða aukaleggur væri að ganga frá Þrándarhrygg yfir Kjólsvíkurskarð, niður Kjólsvíkurmela, yfir Hall og niður Háuhlaup allt fram að gamla bæjarstæðinu. Þetta tekur um 1,5 klst.

Breiðavík er landsnámsjörð. Þar segir Landnáma að Þórir Lína hafi numið land. Fyrir botni víkurinnar er breiður sandur og þar fellur Stóraá (víkurá) til sjávar. Hún skilur að miklu leyti að jarðirnar Breiðuvík og Litluvík (Litlu-Breiðuvík) sem er sunnan árinnar. Litlavík fór í eyði árið 1945. Skammt frá sjó norðan megin í víkinn stóð Breiðavíkurbærinn. Þar var löngum tvíbýlt en byggð þar lagðist af 1943.

Breiðavík var eftirsótt jörð vegna mikils landrýmis og landkosta en slæm lendingarskilyrði þóttu þó mikill löstur. Þá er einnig þokugjarnara í Breiðuvík en í Borgarfirði. Víkin er vel gróin og litskrúðug líparítfjöll skapa ákaflega sérstaka fjallasýn. Landeigendur og Björgunarsveitin Sveinungi á Borgarfirði reistu þar neyðarskýli á níunda áratugnum og sumarið 1998 reisti Ferðafélag Fljótsdalshéraðs þar gistiskála fyrir rúmlega 30 manns.

Heimild: Gönguleiðir á Víknaslóðum.
Útgefandi: Ferðamálahópur Borgarfjarðar eystri o.fl.
Vefsíða.

Þess má geta að fjaran í Breiðavík er ævintýraland barna á öllum aldri. Þar má dunda sér tímunum saman við að skoða rekavið, skeljar, leifar fugla og ekki síður lifandi fugla og önnur dýr. Góð leið er að dvelja í skálanum í Breiðavík og aka, ganga þaðan um svæðið.

Þessa leið má auðvitað ganga í báðar áttir eða fram og tilbaka sem dagleið en þá væri hún frekar drjúg eða um 20 km.