Skemmtileg ganga frá jafnsléttu á verulega fallegt útsýnisfjall sem hentar vel fjölskyldufólki.
Á þjóðvegi 1, leiðinni til Víkur frá Hvolsvelli áður en farið er yfir Markarfljótsbrúna er beygt til vinstri inn Dímonarveg (250). Þaðan eru nokkir kílómetrar að Stóra-Dímon. Á Fljótshlíðarveginum (262) er afleggjarinn rétt áður en komið er að Múlakoti, nokkurn veginn til móts við Gluggafoss.
Í Stóra-Dímon koma saman mörk Austur-Landeyja, Fljótshlíðar og Vestur-Eyjafjalla. Stóri-Dímon á sér systur sem er Litli-Dímon. Nafnið er talið koma úr latínu og merkja tvífjöll eða tveir eins. Þá er einnig sagt að orðið merki heysáta og vissulega minnir Dímin á heysátu.
Við rætur fjallsins er skilti frá Sögusetrinu sem segir frá húskarlavígum Hallgerðar og Bergþóru í Njáls sögu. Þar segir frá vígi Kols, verkstjóra hjá Gunnari á Hlíðarenda, en hann vó Svart sem var húskarl Njáls á Bergþórshvoli.
Stóri-Dímon er 178 metra hár og er það verðugt verkefni, bæði hjá börnum og fullorðnum, að klifra upp á hann.
Ofangreind heimild: Gönguleiðir í Rangárþingi eystra
Útgefandi: Katla jarðvangur
Vefsíða: www.katlageopark.is
Þægilegast er að ganga á fjallið að sunnan þar sem nokkuð greinilegur stígur liggur á ská upp á fjallið.
Myndir
